viernes, 28 de agosto de 2009

Ye pa lo que valen.


Hora xintar. La tele puesta. Un programa cualquiera. El comentarista con una señora faciendo'l tonto. La xente rise. El comentarista rise. La que fai el bobo a costa fecha ye asturiana. ¡Vaya por dios!. Tocónos, chachu. Pienso si se reirán de les babayaes que diz. Si se reirán d'ella. O si, de rebota, se reirán de los asturianos en xunto y xeneral.


Acabo de comer y voi pal ordenador. Acullá siento la tele. Escucho cantar con voz aflautada y permala entonación el "Asturias Patria Querida". Nun voi pal cuartu la tele. Pa qué. Pa ver la xente ya'l presentador arrollicándose la risa, nun paga la pena. Pa sentir vergoña ayena tampoco.


Dalgunos ye pa lo que valen. Pa facer xirigoncia como los bufones d'antañu y facer rir. Pa que se rían d'ellos y, de rebote, de los demás. P'antroxar na comedia mientres esto s'esbarrumba cada día.


Pretendéi cambiar daqué con esti personal. Fala-yos del mileurismu. De los derechos llngüísticos. De la necesidá de tornar la dinámica d'esta tierra qu'enfila cuantayá picu abaxo...


Como diría'l playu: "Yá t'oyí, navaya".


¡Qué País!.

jueves, 27 de agosto de 2009

El güeyu l'agua y la necedá.

Hebo un tiempu onde'l güeyu l'agua del futuru esquitaba enforma. Pero los necios negárense a beber d'ello.

Pasaron los años y la fuerza del so caudal foi amenorgando, magar yera prestosu inda. Pero los necios siguíen testeriando en negase a beber.

Anguaño'l güeyu l'agua del futuru ye una pimpana qu'endagora ye a ufiertar el so filu fresquilín. Pero los necios enfótense en siguir inorando la so presencia.

Como necios que son, encerrísquense en nun querer ver que'l nuberu, enfurruscáu, pue acabar colando cola ñeve, la xaraza o l'orbayu y entós un día'l güeyu escose dando pasu al ermu.

lunes, 24 de agosto de 2009

Per Payares tien que llover y facer fríu.

...Y si l'iviernu que yá asoma pel finxu'l cielu ta pal pulgar, pues hata nevar tamién.

Ello ye que sal ún nún d'estos díes de branu con un chornazu que caen los páxaros a refrescase con unos culetinos y yá tien qu'escuchar, acabante triar el chigre, la fatada del día: "tenía que tar faciendo esti calor hasta Noviembre, polo menos". Y como nun conoces al bocayón de turnu nin tienes ganes de quimeres, pues aguánteste ensin retruca-y.


Un bocayón que pertenez a una d'eses tribes formaes por asturianos hasta la cañamina y a los que-yos repuna tolo ferial d'esti país, dende la llingua hasta'l clima.


Por ellos taríen en camiseta y chancles tol añu rustriéndose al sol como llargateses dientro d'Asturies. Pero, eso sí, cuando pinta la ocasión nun ven contradicción dala pa presumir de paisaxe verde y d'agua a embute, mientres notros llugares anden con racionamientos d'agua y una seca de meter mieu.


Paez ser que la so sesera nun tien riegu enforma (nunca meyor dicho) pa pescanciar que pa tener esi verde y esi agua'l clima de Payares o Avientu nunca nun pue ser el mesmu que'l de Xunetu o Agostu. Y si dacuando llegare a ser ximielgu caminaríamos ensin remediu hacia l'ermu y la tierra arregallao pola falta d'humedanza.


Pues esti tipu de xente arrenegao del nuestru clima yo yá lu conozo paezme que dende siempre. Como conozo dende siempre a tantu asturianu que lleva por santu y seña puñar contra lo de casa y tirar piedres contra'l propiu teyáu, yá seya contra la llingua, la música, los deportes de nuestro o la muga que fai que seyamos un país verde y atlánticu.


Y, como pa detrás, muéstrense impermeables (siguiendo colos símiles climáticos) a tou argumentu defensor de lo propio, pues ehí los tenemos al traviés de los díes, los años y los tiempos, espardiendo les sos brillantes idegues a lo llargo y ancho d'esti malfadiáu país...















viernes, 14 de agosto de 2009

Soi un turista raru.

Nun voi descubrir la pólvora diciendo que'l branu ye la época más escoyida pa dir de folgueta aquellos que lo puedan facer, claro. Yo nesta época vuélvome per unos díes más caleyeru de lo habitual y conviértome nun turista raru.

De mano, soi turista raru porque dedícome a triar llugares d'esta tierra cuando ye de lo más corriente garrar el coche o l'avión y colar ayuri bien lloñe.

Pero la mio rareza mayor nun ye esa sinón otra. Los que dacuando escucáis per esti pergamín yá vos decatarís que me presten les coses de la nuestra historia y cultura. Ellí onde hai un escatafín d'elles tírome yo de calón.

Y esti vezu fixo qu'aniciare en min un pruyiciu por imaxinar coses ellí onde a lo meyor enxamás les hubiere. Y esplícome.

El casu ye que si me da por baxar a una playa a caminar cabo l'agua, cosa que me presta pola vida, miro allarribón pa un cantil que s'adientra na mar y pienso si antañu nun sedría'l sitiu onde s'allugaba un castru. Si miro pal sableru onde s'asoleya la xente pienso si arreblagando sieglos nel tiempu nun habría ellí asitiaes unes salines. Hasta si voi pal pedreru a ver cómo s'escuende dalguna sapa sorprendida, o cómo esguila pente l'ocle un bígaru de pates, pienso qu'al dar la vuelta a un regodón puedo llevar la sorpresa d'atopar un picu asturiense...

Y asina una vuelta y otra per cualquier requexu que tríe. Aquella cueva igual guarda nes coraes grabaos o pintures paleolítiques. Aquel mogote igual ye un túmulu qu'escuende un dolmen coles sos arbíes. Quiciabes aquelles muries son de dalgún castiellu escaecíu pel tiempu y l'alcordanza. Y asina toa una enfilandrada d'exemplos más que vos podría apurrir.

Supongo que too ello sedrá una matuxa propia de los xanos y que nun tendrá mayor importancia que la de dexar a la imaxinación qu'esnale y espansione al so gustu.


Y p'acabar, y por si diere la casualidá que dalgún de vosotros tuviere estes rareces de mio, voi cuntavos lo más gordo: ye'l nuestru país astur tán bayurosu en nicios y buelgues del pasáu que, a vegaes, ellí onde se posa l'andarina de la nuestra imaxinación descubriendo un restu de daqué siempre acaba ún colando colos rebusquinos de la dulda xurgando en butiellu...

jueves, 6 de agosto de 2009

La Carisa, Candás ya'l Fútbol.


Paez ser que les escavaciones en La Carisa y L'Homón de Faro van paralizase por falta presupuestu. Tanto dende les instancies bancaries como de la Conseyería de Cultura nun van apurrir más euros, asina que pue quedar too ente dolco y la media manga.


D'otru llau, les autoridaes de Candás anden esmolecíes pol gran poder contaminador que, a lo que se ve, tien la sidra, asina que van prohibir echalo nes terraces de los bares porque chisca y nun ye plan.


Cuéntovos una anécdota personal. Ayeri tuvi caminando un par d'hores llargues pela mañana. Absolutamente tolos grupos de xente colos que me crucé diben falando del mesmu tema monográficu: el fútbol. Una unanimidá bramente ablucante. Pela tardi petóme dir tomar daqué y fui a un par de sitios. en dambos teníen puesta la tv. y taben echando partíos... de fútbol.


Ye la realidá cotidiana cola que nos atopamos anguaño nesta tierra nuestra. El día a día. Lo qu'hai.

martes, 4 de agosto de 2009

Cuarenta llatigazos.


Esa ye la pena que-y punxeren a una periodista en Sudán por llevar pantalones.


De mano, la pena a la que castigaren a esta muyer y a otres colegues yera de diez llatigazos. Les demás acataron la sentencia, pero ella recurrió y, pa detrás, pidió que se retirare esa llei.


Entós aplicaron-y eso tan conocío de que si nun quies taza, taza y media ya'l castigu medró de diez a cuarenta.


Supongo que naide nun saldrá a xustificar esta salvaxada colo del respetu a les costumbres ayenes o a tradiciones culturales pervieyes o coses pol estilu.


Supongo...