lunes, 22 de junio de 2009

Los asturianos esisten. Lo asturiano esiste.


Esisten los asturianos identitariamente falando. Esiste xente qu'inda caltién munchos o pocos rasgos culturales asturianos y qu'utiliza muncha o poca llingua asturiana. Pero tar tán ehí y esisten, miániques que sí.


Otra cuestión estremada de l'anterior ye que dellos asturianos conscientes de la so identidá seyan quien a conectar colos anteriores. Que consigan somorguiase ente ellos como unos más o que paezan como una tribu urbana más delantre d'ellos.


Ye ésti ún de los alderiques que paecen eternizase ente los que tamos esmolecíos por estes cuestinones. La de ser quien a conectar cola realidá d'esos asturianos qu'abeyen pel país tan guapamente o que tresnemos discursos y planteamientos namás qu'amañosos pal nuestru autoconsumu.


Tamién pudiere ser posible que tarrecemos facer una inmersión nun sólo llingüística sinón cultural na nuestra propia tierra. Conozo xente del centru d'Asturies, y non vieyo, qu'utilicen unos rexistros llingüísticos asturianos impresionantes. Por poner un exemplu fonéticu, utilicen la "x" asturiana cásique too darréu. Dempués lleo o siento opiniones de xente arreyao a la reivindicación llingüística y tal paez que lo anterior nun esiste nenyuri nesta zona y que los que los sentimos tamos suañando o poco menos. Otru exemplu, esta vegada musical. Nuna mesma selmana y nuna de les nuestres villes de la zona central, sentí de viva voz a un rapaz mozu cantar con bon aquello asturianada acompañándose a la gaita y, a los pocos díes, a un paisanu cuntar nuna tabierna que yá nun taba pa cantar acompañándose él mesmu a la gaita como facía de mozu...


La nuestra llingua y cultura tán apostalgaes, eso ye cierto. Pero rescamplen tamién nos sitios y momentos más inesperaos. Y eso tamién ye cierto. Pero los que debiéremos apoyar y emburriar por ello p'alantre somos los primeros en prestanos voluntarios pa firmar actes de defunción ayuri y pa negar que tea vivo lo que realmente lo ta, por mui minorizao que s'afaye, que tamién ésto diba dar pa charrar a esgaya.


Diba facenos munchu bien a toos dexar de repitir clixés tronaos sobre la realidá llingüítica y cultural del nuestru país y poner enforma más voluntá por entemecenos, escuchar, y participar fuera de planteamientos puramente teóricos d'una realidá identitaria asturiana qu'alienda y ta viva, anque mancornidada, que yo eso nun lo niego.


Porque según dalgunos planteamientos y opiniones que contemplo perende diba ser imposible qu'esistiere muncha xente que conozo y que caltienen abondos rasgos indentitarios de nuestro. Y hasta'l mio entornu más cercanu y yo mesmu debiéremos de dexar d'esistir cuantayá... y equí tamos tovía. Y, p'acabar, qué queréis que vos diga, eso de que consideren un difuntu'l mundu en que un se mueve davezu, magar en formes amestaes munches vegaes, yá llega a resultar, más que cafiante, cenciellamente insultante.


domingo, 21 de junio de 2009

Caleyando per Balmonte.

Estos díes d'atrás pruyóme dir caleyar pel conceyu Balmonte de Miranda.

Ellí alcontré un requexu que ye una viesca de cabornios centenarios. Al pie d'un de los más grandes una orquídea mostraba'l so garapiellu de flores rosaes arrecendiendo de manera sele y prestosa.

Desque torné de dar esta revolada nun soi a borrar de la mio mente la semeya de la orquídea xunto al vieyu árbol mostrando l'abellugu de les sos coraes.

¿Sedría esta imaxen dalguna anuncia de los vieyos dioses ástures?. ¿Quiciabes un badagüeyu de nuevos tiempos soleyeros que van anubrir el tenebreru que nos tapez anguaño?. ¿O una simple casualidá ferial de la primavera?.

Güei un esguil blincaba pente les cañes de los árboles al velume del cielu bermeyu del atardecerín.

Cuesta trabayu abondo esguilar. Dacuando ablaya y pesen los costazos como si arrecostinare ún una llábana bultable. Pero namás que puxando y esbrexando por esguilar se pue algamar la lluz.














viernes, 19 de junio de 2009

¿Nacionalistes asturianos?. ¿Hailos?. ¿Úlos?.

Acuantayá lleí unes declaraciones d'un profesor de la nuestra universidá onde consideraba que n'Asturies nun había nacionalistes, sinón xente d'izquierdes qu'apoyaba la reivindicación de la llingua asturiana.

Si acertó o non yo nun lo sé. Lo que sí sé, porque lo lleo ayuri, ye qu'hai xente que con demasiada frecuencia minusvalora la cuestión llingüística ya identitaria asturiana (historia, cultura, etc.) apostalgándoles a un llugar secundariu por aciu de poner na picorota otru tipu de reivindicaciones d'izquierda que considera más importantes. Y too ello espresao en llingua asturiana.

Nun voi entrar n'alderique dalgún sobre si los qu'asina opinen lleven razón o non. Porque entrar na viesca de les espiriques sobre izquierda y nacionalismu asturianos ye metese nun monte onde los totalitarios y los sectarios tienen muncho que dicir, por nun afirmar que lleven, bien de veces, la voz cantante.

Lo que sí m'atrevo a afirmar ye qu'anguaño nos ámbitos de lo que se denomina nacionalismu asturianu hai xente que se considera nacionalista porque se sienten ciudadanos d'un país con una identidá diferenciada y propia y otra xente que tamién se considera nacionalista que considera esa identidá como erbía amañosa pa llograr otros fines, mui llexítimos y defendibles, d'izquierda. Tamién los hai que yá refuguen claramente'l nacionalismu si nun ye como cuestión coyuntural p'algamar esos otros fines. Toes estes posiciones son fácilmente comprobables pescudando les opiniones espardíes perende.

Que en cuálos de los dos primeros casos tamos delantre de nacionalistes asturianos yá ye otra cuestión. Y una entruga que se sopelexa con frecuencia en bien de foros.

Tamién ye posible pa dalgunos ente los que m'incluyo de que llegare'l momentu de matar la lluz y colar d'unaes andeches que tienen perdemostrao al traviés de munchos años que nun dan pa más, arriendes de pa recibir descalificaciones, insultos, y burlles varies. Nortiar l'horizonte, alendar, y escoyer nuevos caminos onde sestaferiar.

Esti país ye mui vieyu. Tien raigones fondos. Y yo sigo creyendo nél y enfotándome nél. ¿Soi yo nacionalista?. Si lo qu'observo nos ámbitos de los que asina se denominen lo ye, entós yo voi optar pola prudencia y considerame dende güei mesmo namás qu'asturianu. Eso sí, asturianu arguyosu de la so hestoria, cultura y llingua. Y que quier ser ciudadanu d'un País Astur llibre y dueñu del so propiu destín.

jueves, 18 de junio de 2009

Escultures y fazañes

De bien antiguo ye vezu allugar monumentos y escultures pa facer alcordanza de personaxes o acontecimientos que se consideren fitos importantes nel camín históricu d'una comunidá. Exemplos hai a esgaya per tol mundu. Vamos recorrer tres llugares namás pa ilustralo.

Entamamos el caleyar nuna islla del Mediterráneu. Ellí, en Mallorca, alcontramos una escultura dedicada a los flonderos baleares, consideraos de los primeros pobladores d'estos llugares y qu'algamaren sonadía nos tiempos de la edá antigua cuando cartaxineses y romanos andaben a la tema pa dominar la contorna.

Dempués podemos pegar un bon reblagu nel mapa y nel tiempu y algamar les tierres norteñes del atlánticu. Llegamos a Escocia y atopamos na cuguruta del monte Abbey Craig el monumentu cola escultura de William Wallace, el héroe nacional escocés del sieglu XIII, que lluchare contra'l dominiu d'aquelles tierres polos ingleses.

Y qué meyor manera pa acabar esti recorríu que tornar mapa abaxo y d'otra galmiada aportar a casa, n'Asturies. Equí podemos contemplar inmortalizaos a Otavio Augusto y a Isabel la Católica na mesma ciudá onde tan los restos d'ún de los castros más nomaos del norte peninsular, Noega, y a bien poca distancia del conceyu onde s'alluguen les ruines del llexendariu Castiellu de Gauzón.

El casu ye que poles sos fazañes podemos conocer quién ye quién y hasta ónde pue llegar caún...

viernes, 12 de junio de 2009

Alcuerdos de mínimos

D'esto que voi escribir güei yá lo fixere en cierta manera abenayá, pero paezme un momentu afayadizu pa volver sobre ello.

Un de los refranes asturianos que más me presten porque me paez que diz una gran verdá ye aquel que nos encamienta que na casa onde nun hai panchón toos reñen y tienen razón.

Cuando llevamos munchayá naguando por algamar unos oxetivos y nun somos a ello, los nervios afloren, el rixu por arrobexanos carrobexazos faise descomanáu, y los enfrentamientos y les discrepancies agrándense en grau proporcional a les frustraciones que sentimos.

Esto pasa en tolos llaos y nun ye nengún ferial privativu nuestru. Llevao al tarrén de la política, tenemos la esperiencia d'esos grandes partíos que cuando ganen y les coses-yos van bien siempre se les componen p'amatagar cualquier conflictu internu. Pero en llegando les vaques flaques xorrecen los desalcuerdos y esfronazos de manera puntual. Y hasta les dixebres tamién.

Si esto ye asina a esos niveles, ¿qué nun nos va pasar a los que nos movemos na faza de lo minoritario?.

Acabante pasar unes elecciones empobinamos per un periodu de dos años que debiéremos d'utilizar con provechu: p'aposentar, pa reflexonar, p'analizar a modo' l finxu'l cielu que tenemos per delantre.

Y pa convencenos dende la cocorota a les dees que namás que'l diálogu, acordies, nos pue llevar dayuri.

Pienso que debemos avezanos a pensar siempre en términos de sestaferia, d'andecha, de comuña. En términos de que toos tamos de la mano d'acá del sucu y ehí enfrente tán los de siempre enfotaos n'acabar cola nuestra identidá colectiva y col nuestru país.

Y tamién pienso que debiéremos remanar de contino y col mayor de los respetos pa toos el conceptu de "alcuerdos de mínimos" basaos nel respetu al que tenemos delantre y al que nun-y podemos negar que tien el mesmu ciñu, enfotu y amor que nosotros por esti país.

Toi convencíu dafechu que ye posible una xuntanza peramplia que va dende los sectores nacionalistes a los asturianistes garrando como base esos "alcuerdos de mínimos". Pa qué nos vamos engañar, nun país tán pequeñu como'l nuestru conocémonos toos y nun nos paga la pena, cuando ye real y palpuñable la que se nos pue venir encima nunos años con un parllamentu inda más antiasturianu que'l que tenemos anguaño, andar a la tema ente nosotros.

Pero primero aposentar los ánimos, danos cuenta que ye la falta de panchón la que nos fai a toos reñer con razón, y que'l diálogu ye posible y pue llevase a cabu dafechu.

Que ye posible sentase a dialogar, a cambiar impresiones sobre'l nuestru país, a plantegar en qué puntos mínimos podríamos toos tar d'alcuerdu y dar el pasu pa engabitar na medida de les posibilidaes de caún, esforzándonos por ser arrogantes y por nun querer apoderar a los demás.

Voluntá y xenerosidá. Si queremos podemos ser quien a espolletar y a tener presencia abonda na nuestra sociedá. Y tamién a algamar d'una puñeflera vegada esi oxetivu pol qu'allampiamos cuantisimayá como ye consiguir representación na Xunta Xeneral.

Too ello ensin escluir a naide en nengún momentu y siendo conscientes caún que vamos tener que ceder tamién en cuestiones que nos resquemen enforma. Y siendo sabedores que nun tamos inventando nada nuevo y peligroso, porque notros llugares d'esti mesmu Estáu que compartimos yá se fixeron esperiencies asina y con bonos resultaos.

Namás que planteanos llegar a un alcuerdu de mínimos. Polo menos que nun se diga que nun lo intentemos...

lunes, 8 de junio de 2009

Previsible.

La batalla de les europees, col enésimu episodiu d'engarradielles caseres, acabó como s'esperaba. Cola flota fundida poles andanaes propies más que poles ayenes. La propia escuadra desarbolada pola mor de los que debieren ser aliaos. Yera lo previsible y cumplióse.

La vagamar de la necedá encargóse de fundir los pocos barcos cayoncos que buscaben la lluz d'un faru que guiare a puertu. Allá, no fondero la mar, los pexes atoparon la sorpresa de tener nuevos abellugos.

Yá nun hai vuelta p'atrás. Demasiáu odiu, personalismu y envizcamientu nun dan pa más. Con barcos fundíos nun hai quien arme flota dala. L'astilleru llariegu tien d'agora pa endelantre xera a esgaya.

Pero que naide nun s'enquivoque. Lo que baxó a sumise nos abismos del océanu nun ye l'intentu de facer política asturiana. Eso que quede nidio. Lo que s'esmució ente gorgolitos nes tenebres ye una manera d'atalantar y de facer esa política basada n'aperrilla-y al vecín y tener como oxetivu ser el "referente" envede planta-y cara al enemigu común.

Hai futuru pa los que quieran enfotase na defensa de lo nuestro de xuro. Pero con naves, tripulación y mandos nuevos que sepan pa onde hai qu'enfilar el rumbu y pacia qué sitiu hai que buscar l'enemigu. Hai muncha xera pa facer.

Pero va ser mui difícil yá de convencer a naide que pel camín de la dixebra y de la griesca, o del simple llevantu, pel que s'empobinó hasta agora paga la pena enrolase na tripulación.

Entrevista al candidatu Pepín de Pepa Pepón.

E--Bones tardes, señor Pepín. Gracies por concedenos la entrevista y que s'afaye.--

P--Gracies a ustedes por invitame. Toi a la so disposición.--


E--Bien, entamamos. ¿Cómo valora los resultaos d'estes elecciones?.--


P--Mui positivamente. Dimos un reblagu importante nel númberu de votos y tenemos que tar satisfechos.--


E--Sacaron ustedes 350 votos y nes anteriores elecciones 345. ¿Ye eso un reblagu?--


P--Por supuesto. Lo fundamental ye siguir avanzando. Y vese claramente qu'avanzamos.--


E--Yá. La so candidatura más directamente rival algamo los 340 votos. ¿Cómo lo valora usté?.--


P--Pues un claru despropósitu y una vergüenza. Si tuvieren dignidá colaríen dafechu pa casa.--


E--Pero namás qu'hai una diferencia de 10 votos colos que sacaron ustedes.--


P--Sï. Pero nun se pue comparar. Contaron con munchos más medios que nosotros. Pegaron 60 cartelos más. Repartieron 24 pegatines y manexaron un presupuestu electoral superior al nuestru de 48€.--


E--¿Y cómo encaren a partir d'agora los prósimos años?.--


P--Con una gran ilusión y plenamente enfotaos. Los fechos demuestren que somos el futuru d'est país. Namás que ye cuestión de tiempu.--


E--Lleven 30 años d'actividá. ¿Cuántu tiempu mas necesiten pa llograr resultaos más bultables?.--


P--Nun se pue predicir. El camín ye pindiu y llargu. La cuestión ta en que sigamos claramente avanzando.--


E--Pues namás. Munches gracies pola entrevista. ¿Desea añadir dalgo más?.--


P--Pues agradece-yos la deferencia d'ivitame. Y tamién agradecer el gran apoyu recibíu de los electores. Ah, y un saludu cordial a l'audiencia.--


E--Non. Si nun tenemos audiencia. Esta entrevista ye una parte de la representación d'una comedia que tenemos preparada pal prósimu antroxu, acompañaos de guirrios y too.--


P--Pues munches gracies igualmente. ¿Y cuánta xente foi a velos na representación del antroxu pasáu?.--


E--Sobre unes 1.200 persones, más o menos.--

P--¿Namás?. ¡Pa tan poca xente nun paga la pena salir de casa, hom!.--

sábado, 6 de junio de 2009

El corriverás.

Allá onde me crié cuando dalguién baxaba a mercar a la villa y dalgun-y pidíamos un xuguete, davezu contestábennos que nos diben trayer un corriverás con cascabelinos atrás. Esperábemos que tornaren con él pero'l trebeyu prometíu nunca nun nos lu apurríen. Dempués de repitise'l casu un montón de vegaes cayíamos na cuenta que yera namás un engañu pa tenenos sollertes ya ilusionaos.

Cada vez qu'observo a esa xente qu'espera sollerte ya ilusionao por que se cumplan les promeses que dende les picorotes del poder-yos ufieren nun puedo evitar que la mio mente esnale tiempu atrás y recuerdo l'aquello del corriverás. Da respigos comprobar hasta qué puntu persones bien adultes y hasta con fíos y nietos s'enfoten en promeses y s'estelen delantre los esparabanes y discursos arrechos de los que dirixen o aspiren a dirixir los destinos de toos.


De nada val qu'una y otra vuelta eses promeses nun se cumplan y que les ilusiones nun se vean recompensaes. L'envizcamientu de bien de xente failo siguir creyendo no qu'enxamás van ser pa ver hasta'l mesmu momentu de dir pal cagüercu.


Si tan neños somos pa dalgunes coses, nun taría de más que nos afatáremos como ellos y fuéremos a recibir a los que nos anuncien de contino esa bona nueva que nun vamos ver nunca nenyuri con un chupu na boca y xiringando con alborozu un ruxideru de cascabelinos nes manes .









jueves, 4 de junio de 2009

Que cosa cosadiella ye una cosa...


Que dexa a ún como pa ponese a mexar y nun echar gota.

Que dexa la intelixencia esturniada como una pamesta al sol d'agostu.

Que te camuda'l cerebru nun queisu de bota.

Que cuando nortia un puertu p'abellugase fuxe d'él a escape.

Qu'anecia nos errores y testeria nel bilordiu, el llevantu y l'amarraza.

Que yá nun da nin risa, nin pena, nin nada. O, si acasu, noxu.

Que tira tanto del tetu de la paciencia que dexa les cañaes recudíes y seques.

Que nin ve nin quier ver, nin siente nin quier sentir, y cuando fala esbabaya darréu.

Que tien como finxu'l cielu nun llegar nunca nenyuri.

Que desprecia tolo que nun seya'l propiu ego, el propiu embeligru y la propia tribu.

Que nagua porque l'otru nun pruebe bocáu a costa de qu'un allampie de fame.

Y qu'empobina pacia la semeya d'arriba a la mandrecha, non pa rezar, non pa visitar, sinón pa utilizala como reposu eternu. Y amén.