domingo, 22 de marzo de 2009

¡Sonríes y a ser feliz!.

Si te llamen el garrulu del portal porque un día un vecín te sintió gargoliar una tonada, o porque dalguién marmuró que te vieren de madreñes, o porque cuerre'l rumor que practiques la cuatriada...

Sonríes y a ser feliz.

Si se ríen de ti na tienda, na cafetería o nel comerciu por falar n'asturianu. Si te dieron milenta portazos nes narices en sitios onde namás que se pue falar castellano...

Sonríes y a ser feliz.

Si malvives d'un trabayu que t'empoza na miseria. O si tienes que colar a un llugar lloñe pa poder ganate'l pan. Y allá dende'l poder te dicen que tienes suerte de poder rular perende pa consiguir esperiencia y conocer munchu mundu...

Sonríes y a ser feliz.

Si cuando te faigas vieyu, nun rellumu llucidez, te das cuenta de qu'enxamás ximielgasti un moñín pa defender lo de to. Y que dexasti n'herencia a los fíos y los nietos un país esfarrapáu que nun da nin pa vivir y onde son unos simples estranxeros...

¡Sonríes y a ser feliz!.

martes, 17 de marzo de 2009

L'home que falaba col embeligru

Conocí cuantayá a un paisanu que namás que-y petaba falar col so embeligru. Llevaba trenta años esperando por que-y contestare, pero enxamás consiguiere que-y gorgutare pallabra dala. Paezme que se llamaba... Nacio Naliegu o dalgo asina.

La xente cozcábase a él, mirábalu y colaba. Nunca-y falaben porque sabíen que nun-yos diba contestar. Nin siquiera volver pa ellos los güeyos. Él sólo quería falar col embeligru. Entós alloñábense xuxuriando que yera un alloriáu.


Un día dexé de velu y pasó abondu tiempu ensin que supiere d'él más nada. Hasta que quixo la casualidá qu'atopare a un trasgu vieyu que taba entreteníu tirando idegues egocéntriques y tronaes pel furacu de la mano. Cuando-y entrugué por aquel paisanu, va y contestóme:


--Sí, ho, yo tamién lu conocía. Morrió va tiempu sólu mientres la xente pasaba ensin facer casu de lo que consideraben la so llocura. Eso sí, hasta cuando taba dando les boquiaes, nunca dexó de falar col so embeligru.--

domingo, 15 de marzo de 2009

Como'l raitán

Ye importante tar. Y ser consciente que se ta. Ayuri. Porque la presencia ye'l sofitu que pue ayudar a llevantar otru futuru estremáu al que nos dibuxen manes ayenes movíes pol despreciu y la zuna.

Alla, nel otru llau, en dalgún llugar sabemos qu'hai más xente que ta. Presentímoslo. Intuímoslo.

Un barruntu que cuando l'ánimu aposienta que ye'l primer requisitu pa uxar el desánimu conviértese en certeza.

Dacuando ye mester abrir les ventanes de la mente y el corazón y dexar qu'entre aire fresco. Abri-yos pasu a los rayos del sol. Y d'esta miente llimpiar de mugor los requexos más visiegos de nuestro.

Ye prestoso ver cómo se comporta'l raitán. Faes un llabor y ellí ta el contemplándote dende'l suelu, dende'l bardial o posáu nel mangu del garabatu. Llega un momentu en que nun lu ves pero tas seguru qu'anda per ende. Acompañándote cuando contabes que tabes sólu na xera.

Nunca hebo una andecha que nun finare llantando'l ramu. Convién tener la garulla abondosa porque siempre pue aportar a echar la so gabita'l collaciu que caleya buscando posafuelles. Y que sabemos qu'anda perende anque nun lu veamos de contino. Como'l raitán.

martes, 10 de marzo de 2009

En Babia a costa fecha.

Tar en Babia ensin dase cuenta nun ta bien, pero pue considerase un fallu. Talo a costa fecha ye una patochada que muestra tener poco xacíu.

Encerriscámonos nes nuestres posiciones. Queremos que'l mundu venga a nosotros envede dir nosotros a él. Practicamos una versión rabiosamente autóctona del despotismu ilustráu: too pal pueblu asturianu ensin contar con él.


Entamamos proyectos pa nosotros. Dememos nel nuestru castañéu, amagostamos nel nuestru farol y comemos siempre los mesmos. Queremos que participe más xente, pero nun dexamos nin siquiera la puerta entornada, siempre trancada.


Iguamos el nuestru mundu d'espaldes a la sociedá y esprecetámonos porque siempre l'alcontramos a ella coles espaldes vueltes. Somos un gremiu cola nuestra propia xíriga que nin siquiera nos molestamos en pescudar si dalguién ehí fuera, ayuri, nos entiende.


Encerriscámonos en xugar el nuestru xuegu siempre de la mesma manera. Esa manera que fai que nunca seyamos a facer un puñadín de bolos. Y, al empar, asustámonos de que les boleres na sebe de los nuestros proyectos seyan una constante nel nuestru traxinar.


Nun ye la sociedá asturiana la que tien que venir a nosotros. Somos nosotros los que tenemos que dir a ella. Y pa esto fai falta tresnar proyectos que s'entiendan, que conecten, que puedan echar raíces y consiguir apoyos ehí fuera. Los gremios y les xírigues son maneres de construir castiellos na playa. Y yá ye hora de que la dexemos pa los rapacinos.


Yá vaga'l día de qu'espabilemos y nos pongamos con remangu a trabayar d'otra manera. De construir pa fuera, de salir del discursu tribal y abrir les nuestres puertes a esa xente que ta ehí al otru llau. Si siguimos empeñaos n'iguar sociedaes virtuales va ser la realidá la qu'acabe matando la lluz del nuestru mundu virtual.


Pa cambiar una sociedá hai que la conocer a fondo primero, somorguiándose nella y tamién participando nella. Porque sinón van ser siempre otros los únicos con capacidá d'influir nesa sociedá y de cambiala al so antoxu mientres nosotros vagamos constantemente per... Babia.

domingo, 8 de marzo de 2009

Selmana Negra nel Campus de Viesques

Yá dende los romanos se sabe qu'una manera amañosa pa gobernar ye ufiertar aquello de pan circu.

El réximen de la rosa sabe bien d'esto y cuanto menos pan tenemos más circu nos ufierta.

Ún de los sos chiringos favoritos ye'l folixeru y llámase Selmana Negra.
Un mangaráu difícil de definir onde s'entremez un poco de too, xunío pel filu común de lo zaparrastroso.

El casu ye que tienen siempre problemes p'allugala y nesti sen paez ciguada y nácen-y los xareos como cogordes. Los vecinos de los sitios onde la ponen acaben remontándose y llegando incluso a los xulgaos.

La última ocurrencia p'asitiala foi llevala al Campus de Viesques. Y les reacciones nun se fixeron esperar. La comunidá universitaria recibió d'uñes esti chiringu veraniegu. Argumenten coses tan difíciles d'entender pa los xestores del réximen qu'aquél ye un sitiu pa estudiar ya investigar, pero non pa la candanga ya'l tiruliru folixeros.

A lo meyor ye qu'esti réximen heredó del anterior aquella frase célebre de que "investiguen ellos" p'amatagar la falta d'investigación interna na xida de qu'eso yera cosa de pacullá de les fronteres estatales.

Veremos ver en qué para la cosa, porque esi eventu celébrase pal veranu ya inda queda tiempu pal alderique y pa ver en qué para al final too ello. Pero la comunidá universitaria tien un datu escontra que a lo meyor nun reparare nél:

Y ye qu'ún de los puntos fuertes d'esi esperpénticu ferial ye la bayura de pinchos calientes que pues papar a dos manes, de tolos tipos y tamaños. Y yá se sabe qu'al nuestru presidente esti tema ye capaz de facelu zarramicar los güeyos, esbozar una sonrrisa d'oreya a oreya y llevitar como un globu.




jueves, 5 de marzo de 2009

Cruzada antiasturiana en Cangas del Narcea


Pal réximen clientelar instaláu n'Asturies y les organizaciones que d'él se beneficien el llugar de la llingua asturiana ta bien claru cuantayá. Tien que permanecer arrequexada nos ámbitos de lo familiar y coloquial. Fuera d'ehí son espacios torgaos pal so usu.


Un exemplu que rescampla estos díes ye'l de Cangas del Narcea. Bastó que dende l'ayuntamientu se mostraren favorables a que la llingua asturiana pueda puntuar nes oposiciones que convoque pa que la maquinaria antiasturiana del réximen entainare a tratar de mancorniar esti pequeñu avance cangués.


Y ehí tenemos a los voceros del réximen esparabaniando y glayando la supuesta illegalidá de la midida.


Y ehí tenemos a la prensa faciendo d'altavoz de los represores llingüísticos.


Y ehí tenemos un par de sindicatos que, cola que ta cayendo n'Asturies, muéstrense más preocupaos de si un opositor nun sabe qué ye una che vaquiera que de la posibilidá de que pueda consiguir un trabayu que-y permita ganase'l pan.


Tamién tenemos nel exemplu cangués una de les pruebes más clares de por qué hai esi encerriscamientu contra la oficialidá del asturianu. Nun quieren que s'abra nin una sóla puerta que permita a los sos usuarios emplegala fuera de los ambientes familiares y coloquiales que mencioné al principiu. La so intención ye dexala que muerra adulces, como un paxarín, a base de torga-y toles salides posibles a la so situación.


En fin, ehí tenemos un exemplu claru de cómo funciona un réximen clientelar. El que tenemos enriba de los nuestros llombos, más concretamente.


Y tamién queda claro de qu'hai organizaciones polítiques y sindicales que cuando dicen tar pola oficialidá de la nuestra llingua nun faen otra cosa qu'un xuegu de cinismu y demagoxa.

miércoles, 4 de marzo de 2009

Responsabilidaes compartíes.

Hailos que piensen que se pue engañar a tol mundu tol tiempu. Que se pue tar eternamente diendo colos de la feria y tornando colos del mercáu. Que se pue ser llobu y oveya al empar.

Cuando unes fuerces polítiques roblen un pactu de gobiernu toes eses fuerces son igualmente responsables de les bones polítiques qu'esi gobiernu faiga y de les males tamién.



Esto treslladao al tema en caldia siempre de la llingua asturiana quier dicir que la política llingüística d'acosu y derribu que se vien aplicando n'Asturies nes dos últimes llexislaures ye responsabilidá de tolos que roblaron los respectivos pactos de gobiernu nel so día.



Nun se pue tar nun antroxu permanente. Equí hai que dicir alto y claro que tanta culpa tien el que mata como'l que tien pela pata. Sofitar a los que torguen el futuru a la llingua asturiana y, darréu, desfacese en crítiques y llamentos pol efectu d'eses torgues ye un actu de cinismu, hipocresía y desvergüenza.



La calamocha del gochu fartón que se llanza como sobre la esllaba enriba del nuestru idioma ye compartida. Represéntalos a toos. Repito: a toos.



Y tolos que roblaron esta desvergüenza política qu'hai asitiada n'Asturies son igualmente responsables.

Yá valió de reíse de la xente y de tratar de que cuelen les sos trampes y xigomencies. Porque'l so xuegu puercu lleva rescamplando cuantisimayá, y yá somos munchos los que tamos fartucos de que nos pretendan facer pasar por tontos dafechu.