jueves, 26 de febrero de 2009

Un tótem llantáu metanos los megollos.

Finó l'antroxu. D'equí a poco va dar les boquiaes el ciclu ivernal. Alluendi, nel finxu'l cielu, va facer galanes la primavera. Inda queda tiempu. Quiciabes enagora puedan aportar la ñeve ya'l fríu. Pero l'iviernu prepárase p'abrir l'antoxana a una nueva estación.

Y ehí tenemos al tuertu gran xefe Pamestona ya'l rancoyu gran fechiceru Carafigu. La parexa indestructible de la tribu feseania. Llantando'l so tótem de veceros y vividores. El ciclu de la llaceria repetitiva sigue'l so sen.

El gran xefe nel país de los ciegos ya'l gran fechiceru nel mundu de los capaos. Mandando. Ordenando. Faciendo. Desfaciendo.

Pero asina ensin más plantegao nun dexa de ser una trampa que rescampla. Porque'l so mandatu incuestionable débese a una sumisión a costa fecha. Xente que pue ver y nun quier. Xente fértil pa crear qu'empoza la so xixa pa que los capones de la tribu s'enchipen de les sos ximuestres.

Munchu desdexamientu. Abonda llerza. Complexos a embute. Dexase llevar de manera colectivamente suicida. ¿Qué porgüeyu se saca de too ello?. Pa los que tienen el pan ganao de xuro, quiciabes pueda atopase una razón o una xustificación. Pa los que nun lu tienen ye enforma más enguedeyao alcontrala.

Los güeyos del agua dícennos qu'inda tamos amalaos. Carecemos del envizcamientu de dexanos arrastrar pola vagamar de los acontecimientos repetitivos. Glayamos, fatos, na cuguruta d'una fola que ye un espeyismu y nun ye nuestra. Que nos escentella una y mil vegaes escontral cantil d'un destín ayenu y gafu.

Pamestona y Carafigu manden. Enfotámonos como alloriaos en que lo faigan. Llántennos el so tótem metanos los megollos de nuestro. Fráyennos y zúquennos la cazumbre presos na so telaraña onde la guaxa que nutre a la tribu feseania va dexando cada vuelta más escosu'l nuestru futuru.

Un futuru que pue cambiar dafechu. Basta pa ello con un simple actu d'identida y enfotu colectivos.
Pero un actu y un enfotu qu'anguaño son inda una utopía mui lloñe d'algamar.

martes, 24 de febrero de 2009

Ciudadanos: ¡ye l'antroxu!


¡Antroxu fuera!. ¡Llegó l'antroxu!.


El día en que la patria ye la mázcara y la comunidá de naciones la mazcarada. La fecha en que los sidros son los gobernantes que nos guíen pel camín que nos peta y nos da pola gana pagana.


Güei tamos nosotros na parte cimera de la caleya pa tira-yos el goxu ardiendo a los xixilistrones, manguanes, fíos d'aquello y demás gandaya. Que les sos xigomencies y pandorgues amburen nuna foguera xigantesca.


La celebración de la santa más santa de tol santoral prohibíu: Santa Pitanza. Cuando'l butiellu ruxe con ganes d'entrar en danza. La venganza ancestral contra la güestia de la fame y la tristura añerada dende milenios nel nuestru subconsciente colectivu.


Allalantrón asomen los nublones de la eterna cuaresma nel finxu'l cielu. De les represiones. De la sonrisa mariella y fedionda de los poderosos dispuestos a chupanos hasta la última gota de la nuestra sangre como una guaxa sollerte. ¡Nun lo escaecer y tar arremangaos pa defendevos!.


Pero güei non. Porque tócanos ser república de mazcarites y amos de los raigaños más fondos de los nuestros ancestros. Por un día vamos ser nosotros ensin torgues.


Ciudadanos: ¡ye l'antroxu!.




sábado, 21 de febrero de 2009

Peletería proletaria (ripios pal antroxu)


Ello yera que se yera

nuna villa sandunguera

una alcaldesa-duquesa

por dos mil pelleyos presa

qu'aquesti humilde plumilla,

de pluma, tinta y cuartilla,

inmortalizar quixera.

Y encamiento llibre dios

de toa culpa al que lleera

estes rimes, ripies primes,

d'un ripiador de tercera,

pues la vida gayolera

nel nome'l trabayador

¡mialma si nun da fedor!

cuando ondea la bandera

del asesín calavera

d'un indefensu visón.

Nun tome entós a risión

llector, si dalgún hubiera,

esta fueya volandera,

pues engurria'l corazón,

l'alma, moral y razón,

que na villa sandunguera

onde'l trabayu morriera

cuantayá d'inanición

faigan güei exhibición

del más puru gustu hortera.


Robla esta fueya antroxera:

Quevedín de Bloguesfera.

martes, 17 de febrero de 2009

Come más fabes, Pachu.

De xemes en cuando dende los despachos de la Xunta Xeneral apúrrennos perles cultivaes que nun sé si porque'l personal yá nun-yos fai casu, o porque cuando tas avezáu a sentir babayaes desque te llevantes hasta que t'achuques, una más nun la notes.

Ello foi qu'esta vegada'l conseyeru de turnu encamentaba al traviés de los medios de comunicación peselbristes que una medida amañosa pa salir de la crisis yera que xubilaos y prexubilaos consumieren más. Quciciabes lu traicionare'l sucosciente porque, a lo meyor, que nun lo afirmo rotundamente, neses clases sofítase una bona montonera de los votos que caltienen el réximen al que la puñeflera crisis pue facer taramingar. De toles maneres, de xuro qu'hai ente esta xente dalgunos que cobren de dos mil a tres mil eurucos p'alantre al mes y quiciabes puedan echar la gabita solicitada. Pero camiento que tamién los debe haber que nun son algamar el mileurismu, y estos pocu consumu adicional van poder facer.


Lo que quiciabes-y faltó amestar al ocurrente ye per ónde había qu'entamar a consumir. Y reflesionando sobre l'asuntu, paezme que'l cogollu la cuestión ye entamar a comer más. Vamos, el doble, por exemplu. La cadena qu'empecipiaría asina ye evidente:


Al comer el doble, hai sobrepesu. El sofá onde vemos la tele va quedar pequeñu y ehí tenemos al primer beneficiáu, el de la mueblería. Si'l coche ye vieyucu pue notase que yá nun tira como antes ya'l vendedor del concesionariu va agradecelo en forma. Tamién la ropa va quedar pequeña y ehi ta'l probe de la butique d'enfrente pingándo-y la mixuela de ver pasar la xente. Escaecíaseme, por supuesto, la mayor venta de les tiendes de comestibles y mayor pedíu a los suministradores. Si'l fartón cansa del sobrepesu pue dir al médicu a ponese a dieta y mandalu a por un adelgazante de la que-y aconseya facer deporte. Matamos entós tres páxaros d'un tiru: dámos-y de comer al de la farmacia, al de la tienda de ropa deportiva y al del xinasiu si pintare tamién.


En fin, qu'a lo meyor tengo que me contradicir y da-y la mio cordial norabona al señor conseyeru porque igual tuvo una idega brillante y yo toi escarabayando tontaes fefugándola. Asina que si tenéis dalgún en casa que cobra y nun trabaya yá sabéis... Arriendes d'esto podíamos tamién sacar un nuevu gritu guerreru p'amestar al tradicional "¡Ixuxú!" o al más modernu "¡Puxa Asturies!", que podría ser guapamente:


"¡Come más fabes, Pachu!".

domingo, 15 de febrero de 2009

Vil.larina.


Garráronla unos turistes escentellada. Curiáronla los que se supón qu'entienden d'estes coses. Dempués, tres de sopesar si caltenela en cautividá o arriesgase a solatala de nuevo, fixeron ésto último.


Tampoco nun la dexaron a la so suerte. Ta xixilada y tiénen-y comida guardao por si pudiere necesitalo. Les útimes noticies que tuvi foron que taba atropando xamasques pa iguar un sitiu afayadizu pa enarciar.


Espero qu'a estes altures tea yá enarciada y que sobreviva al iviernu.


Prestaríame tener noticies na primavera de que Vil.larina anda trepando pela viesca buscando comida y bien de salú. Y esto tamién-y diba prestar a muncha más xente. Nun m'entruguéis por qué.


Dalgunes persones y dalgunos xanos somos asina. Nun paga la pena da-y vueltes al asuntu.

jueves, 12 de febrero de 2009

De guirrios y mazcaraes d'iviernu.

Los guirrios destaquen por dar grandes saltos sofitaos nes sos pértigues. El meyor guirriu ye'l que más salta. Algamar altura y arreblagar lo más lloñe que'l restu la xente. Ser un referente y destacar. Pero tamién poder asina pasar penriba sebes y portielles. Les llendes, esi tema cimeru nel mundu rural, el guirriu sáltales. Tamién equí ta percima.

El guirriu nun va mazcaritáu, va camudáu que ye otra cosa. Tien atributos del mundu animal como les melenes (pelleyes d'oveya) y les esquiles. Pero nun ye rebañu, ye pastor. El ruxir de los lloqueros failu de nuevo referencia. El so capiruchu encintáu failu destacar del grupu. Cuando va cola comedia empobina, llévala, organiza les sos representaciones. Tien un claru papel de guía y cabezaleru.

El so capiruchu acaba rematáu nun rau de raposa. Con él toca a les muyeres recordando ritos fálicos, de fecundidá.

La so actividá espúrrese durante l'iviernu: Avientu, xineru, febreru. Nun ye un personaxe xuníu namás al antroxu. Y l'iviernu ye la época más gafa nuna sociedá tribal. Nél la tierra nun da, los árboles nun dan, el fríu llega a la caña'l güesu y la muerte achisba más que nunca. Y ehí ta'l guirriu, parcorriendo'l territoriu ensin parase nel llendes.

Y tovía tan ehí n'alcordanza de la xente más vieyo. Dacuando sal dalgún grupín d'ellos anque la so brenga tea anguaño mui débil. El guirriu: el xamán, el guía, l'arcordanza viva d'una sociedá ancestral.
.................................................................................................................................................................
Los prósimos díes 14 y 15 de Feberu van celebrase en Valdesoto (Sieru) les II Xornaes de Mazcaraes d'Iviernu, entamaes pola asociación Los Sidros y les Comedies.

El sábadu 14, a partir de les 18:00 hores, van presentase dos mazcaraes: El Guirria de San Xuan de Beleño (Ponga) y Os Reises de Tormaleo (Ibias). Darréu va celebrase un alderique con informantes y espertos en Mazcaraes d'Asturies moderáu por Xosé "Ambás".

El domingu 15 a partir de les 12:00 va haber un Desfile de Mazcaraes cola participación d'Os Reises de Tormaleo, Os Reises de Valledor (Vezos Astures), y los Sidros de Valdesoto. Va ser la primer vez que se faiga n'Asturies un desfile onde van tar xuntes unes mazcaraes que nun salen del so entornu.

Una iniciativa prestosa que paga la pena difundir y sofitar. Les mazcaraes d'iviernu son un raigañu importante de la nuestra cultura tradicional. Ah, y a los que queráis averavos de mazcaritos a Valdesoto, encamiéntasevos que vos marutéis a la manera tradicional pa dir acordies col sen de les xornaes.

lunes, 9 de febrero de 2009

Consuelu al desconsuelu.


Tal pudiere paecer que en ciertes instituciones asturianes viviere'l Sumiciu como gatu n'escarpín. Y qu'ello provocare que dacuando desapaecieren coses, como por exemplu solicitudes del Estáu pa informar sobre la llingua asturiana al Conseyu Eurpéu. Un nuevu carrobexazu que s'avienta contra esti vieyu idioma que paez afayadizu pa ser siempre'l sacu de los palos.


Pero non. Nun hai sumiciu nengún, sinón una descomanada Icompetencia que fai que ciertes persones vayan a una oficina a guariar y a cobrar un prestosu sueldu a cambiu de nun se sabe mui bien pa qué. Y entós ciertos papeles descabárriense, acaben na papelera o, quien sabe si-y valieron a daquién pa enfrescar ciertes partes púdiques una mañana que les tripes dixeron basta.


Dempués el bon facer de los de siempre (gracies AXA) fai que la trampa rescample y tienes qu'aguantar, pa detrás, eses esplicaciones que se dan cuando se ta completamente seguru que l'interlocutor que les va sentir ye fatu dafechu, y que puen dir dende'l "nun m'alcuerdo" a minimizar la importancia del desastre cometíu.


Dalgunos piden dimisiones. Cosa abegosa de consiguir cuando se siente'l prestosu ruxir de la corexa nun contestu onde ehí fuera anda la xente esmesando'l pelo a puñarraos por buscase una vida medio decente.


Compruebes tamién cómo hai ámbitos onde'l pandillismu, el tribalismu y l'amiguismu son el finxu que guía les actuaciones, y onde'l golor a mugor faise yá tan fuerte que baliar, ventilar y asoleyar sería un llabor mui recomendable.


Al final quédate esi tastu amargu de comprobar que nun hai consuelu al desconsuelu que te produz observar cómo nes instituciones que debieren defender los intereses de nuestro, añera una pollerada cada vegada mayor de mafiosos, caradures ya incompetentes.

miércoles, 4 de febrero de 2009

La culpa de Don Naide.


Malpenes ensin anubrir los rescoldos del espolín pola talla erótica del horru llavianés, tamos otra vuelta con más horros, esta vegada valtaos en San Andrés de los Tacones en Xixón. Dicen qu'unos ochu, dalgunos de doscientos años acabaron nun montón de tables y escombros.

La secuencia d'estos atentaos contra horros, casones, o cualquier elementu patrimonial esbarrumbáu siempre ye la mesma.

La primer fase entama marcando l'oxetivu. Dempués, actuando a lo zorro, túrriase contra l'elementu a esgonciar. Acabante l'acción toca ponese a xiblar y a despistar a ver les reacciones.

Esa ye la segunda fase, les reacciones. Puen dase dos casos. Que a pocos-yos esmoleza colo que se da l'acción como esitosa nel intre. O que les protestes entamen a medrar como una bola nieve qu'amenaza con chiscar a dalgún organismu o institución. Nesti segundu casu pasamos a la tercer fase.

Na tercer fase l'organismu o institución afectada, pongamos el Gobiernín o dalguna conseyería, anque sepan perfectamente tola maturranga, salen al balcón a grita-y a la plebe:

--¡Cóime, nun sabíamos nada!. ¡Vamos entamar darréu una fonda investigación!.--

Y entramos na cuarta fase. El paripé de la investigación. Una comedia propia de los vieyos antroxos pa enguedeyar al personal y amoriar a los que piden esplicaciones:

--¡Foi la ZALIA, violo tol mundu!--

--¡Cudidadín colos llevantos!. Nosotros nun toquemos un pegollu.--

--Entós foi Pepín de Pepa Pepón...--

--¿Que qué, ho?. ¡Ca!. ¡Pa min nin mirar, que yo nun se nada!--

--Entós, ¿quién rediós foi?--.

Ya tamos na quinta y última fase. D'un caxón sácase'l papel onde van dase les conclusiones de la investigación y pesllar el casu. Ta too escrito y namás qu'hai que-y poner el cuñu, la fecha y la firma:

1) El culpable foi Don Naide.

2) Dase por zarráu'l casu.

3) Equí paz y dempués gloria.

4) A vivir que son dos díes.

(Sellao y roblao...)

Resueltu l'asuntu queda volver a empezar otra vuelta con otru casu. Fixar l'oxetivu, actuar a lo zorro y turriar contra l'oxetivu, etc. etc. etc...

domingo, 1 de febrero de 2009

De Cagüeñes.


Dacuando cuéntenme anécdotes que nun me caen embaxo. L'otru día tuvieron pasiando pela mio viesca un grupu docentes y ún d'ellos cuntóme lo que vos relato.


Tando un maestru nun aula d'un colexu dando clas a rapacinos d'ente seis y siete años, ún d'ellos pidió-y permisu pa dir facer l'aquello. Dió-ylu y l'escolín empobinó pa la puerta, abrióla y salió, pero nun la volvió a zarrar polo que se-yos escapaba'l calorín del aula.


Asina que'l maestru llamó al guah.e y díxo-y:


-- ¡¡Andrés, ¿tú que yes de Madrid, ho?!!--


Y va'l rapacín, dando la vuelta, arremellando unos güeyos como platos y tou trescendente va y respuende:


--¡¡Non. Yo soi de Cagüeñes!!--