viernes, 28 de diciembre de 2007

De cómo me crié, ónde vivo y a qué me dedico


Como tol mundu sabe, los xanos somos los fíos de les xanes. Pa crianos les nuestres madres cámbiennos pol fíu de dalguna muyer recién parida del llugar pa que nos críe si nun se decata d'ello. Mio ma cambióme a min pol rapacín d'una muyer de pa contra Caravia. Crióme durante los tres primeros años de la mio vida, hasta qu'un día descubrió l'engañu por culpa de qu'empecipió a creceme pelo roxo per tol cuerpu y nun me paecía gota a nengún guahe de tola rodiada. Asina qu'encabritada enforma, solmenóme una patada nel fornicu que toos tenemos xusto debaxo del renaz y, dende entós, vivo abellugáu nun caborniu dedicándome a los mios llabores de druida y bardu, mentes faigo de pastor d'esguilos, llondros y melandros y como a base d'arramplar coles ablanes, castañes, figos, manzanes y tolo qu'echen los árboles de la xente que me queda a un par de tiraes de gomeru d'onde vivo.
Un saludín...¡y namás por güei!. ¡¡Ixuxú!!.

sábado, 8 de diciembre de 2007

Escucando y entamando

Marzu nialarzu, abril güeveril, mayu paxarayu,
en San Xuan esnalarán, y per Santa Marina
buscarán la vida..............................
.................y allá un día per avientu,
nesti filandón el xanu
entra pa cuntavos esto: